அருளும் பணியும். இன்றைய இறைமொழி. வியாழன், 4 செப்டம்பர் ’25.

Thursday, September 4, 2025   Fr. Yesu Karunanidhi   Archdiocese of Madurai

இறைவனுக்கு உகந்த வாழ்க்கை அருள்-பணி கிறிஸ்தவ நம்பிக்கை இறைவேண்டல்-செயல்பாடு அறிவு-பணி இறைமக்கள் உரிமைப்பேறு திருஅவை-திருப்பயணிகளின் கூட்டம் ஒளியின் அழைப்பு மீட்கப்பட்ட நிலை இயேசுவின் அழைப்பு கிறிஸ்தவர்-மறைத்தூதுச் சீடர் ஒளியின் மக்கள்

இன்றைய இறைமொழி
வியாழன், 4 செப்டம்பர் ’25
பொதுக்காலம் 22-ஆம் வாரம், வியாழன்
கொலோசையர் 1:9-14. லூக்கா 5:1-11

 

அருளும் பணியும்

 

1. ஆண்டவருக்கு உகந்த வாழ்க்கை

 

இன்றைய முதல் வாசகத்தில் கொலோசை நகரத் திருஅவைக்கு எழுதுகிற பவுல், ‘நீங்கள் அனைத்திலும் ஆண்டவருக்கு உகந்தவற்றைச் செய்து அவருக்கு ஏற்புடையவர்களாய் நடந்துகொள்ள வேண்டும். நீங்கள் தரும் நற்செயல்கள் அனைத்தும் செய்து கடவுளைப் பற்றிய அறிவில் வளர வேண்டும்’ என்று அறிவுறுத்துகிறார். அறிதலும் அறிதலுக்கு ஏற்ப செயல்படுதலும் ஆண்டவருக்கு உகந்த நிலையில் வாழ நம்மை உருவாக்குகிறது.

 

அறம் பற்றிப் பேசுகிற திருஅவையின் மறைக்கல்வி, ‘நற்செயல் செய்வதற்கான உறுதியான மற்றும் பழக்கமான மனப்பாங்கே மதிப்பீடு’ (எண். 1803) என மொழிகிறது. ஆண்டவரைப் பற்றிய அறிவு நம் அன்றாடத் தெரிவுகளை நெறிப்படுத்தும்போது நம்மால் புனிதத்தில் வளர முடியும்.

 

நம் கிறிஸ்தவ நம்பிக்கை என்பது அறிதலில் மட்டுமல்ல, செயல்பாட்டிலும் வெளிப்பட வேண்டும் – இறைவேண்டல் செயல்பாடாக மாற வேண்டும், அறிவு பணியாக மாற வேண்டும், அருள் கனிதர வேண்டும்.

 

2. இறைமக்களுக்கான ஒளிமயமான உரிமைப்பேறு

 

இருள், ஒளி என்னும் இரண்டு உருவகங்களை எடுத்தாளுகிற பவுல், கிறிஸ்து வழியாகவே நாம் மீட்பையும் மன்னிப்பையும் பெறுகிறோம் என்கிறார். இருளிலிருந்து ஒளிக்கு நாம் தொடர்ந்து நகர்ந்துகொண்டே இருக்கிறோம்.

 

‘மக்களினத்தாரின் ஒளி’ (எண். 9) என்னும் இரண்டாம் வத்திக்கான் சங்க ஏடு, திருஅவை என்பது திருப்பயணிகளின் கூட்டம் என மொழிகிறது. ஆண்டவராகிய கடவுள் கிறிஸ்து வழியாக நம்மை இருளிலிருந்து ஒளிக்கு அழைக்கிறார்.

 

நம் மீட்கப்பட்ட நிலை என்பது பாவத்தை நாம் விலக்கி விடுவதிலும், கிறிஸ்து வழங்குகிற கட்டின்மையைப் பெற்றுக்கொள்வதிலுமே இருக்கிறது. ஒவ்வொரு நாளும் நாம் கேட்க வேண்டியது இதுதான்: நாம் ஒளியின் குழந்தையாக வாழ்கிறேனா? அல்லது நிழல்களுக்குள் கட்டப்பட்டுக் கிடக்கிறேனா?

 

3. அச்சத்திலிருந்து பணிக்கு

 

இன்றைய நற்செய்தி வாசகத்தில், அளப்பரிய மீன்பாட்டைக் கொடுத்து பேதுருவைத் திக்குமுக்காடச் செய்த இயேசு, ‘அஞ்சாதீர்! நீர் மனிதரைப் பிடிப்பவர் ஆவீர்!’ என்கிறார். தன் தகுதியற்ற நிலையை உணர்கிற பேதுரு அனைத்தையும் விடுத்து இயேசுவைப் பின்பற்றுகிறார்.

 

‘நற்செய்தியின் மகிழ்ச்சி’ (எண். 120) என்னும் திருத்தூது ஊக்கவுரை, ஒவ்வொரு கிறிஸ்தவரும் மறைத்தூதுச் சீடர் என மொழிகிறது. நாம் அனைவரையும் நற்செய்தியின் மகிழ்ச்சியை அறிவிக்கும் அழைப்பைப் பெற்றுள்ளோம்.

 

நம்முடைய அன்றாட அலுவல்களில் நாம் ஈடுபட்டிருக்கும்போது ஆண்டவராகிய கடவுள் நம்மைத் தேடி வருகிறார். நம் படகில் ஏறி நம்மேல் உரிமை கொண்டாடுகிறார். வெறுமையான கரங்களை மீன்பாட்டைக் கொண்டு நிரப்புகிறார். பேதுரு போல நாம் நம் தகுதியற்ற நிலையை உணர்ந்தாலும், நம் வலுவின்மையை வல்லமையாக மாற்றுகிறார். அச்சத்தை விடுத்து அவருடைய சொற்களின்மேல் பற்றுறுதி கொள்ளும்போது நாம் அவரைப் பின்பற்றத் தொடங்குகிறோம்.

 

நிறைவாக,

 

ஒளியில் நடந்து நம் அழைப்பிற்கேற்ப நம் வாழ்வைத் தகவமைத்துக்கொள்ள அழைக்கிறார் பவுல். நம் மீட்பைக் குறித்து நாம் மகிழ்ச்சி அடைய வேண்டும். பேதுருவை அழைத்த இயேசு நம்மையும் அச்சத்திலிருந்து அழைக்கிறார். நம் அச்சம் களைகிறார். நற்செயல்களில் கனி தரவும், ஒளியின் மக்களாக வாழவும், கிறிஸ்து நம்மை அழைக்கும் இடங்களுக்கு நகர்ந்து செல்லவும் நம்மை அழைக்கிறது இன்றைய இறைவார்த்தை. அவருடைய அருளே நமக்குப் போதும்!

 

அருள்திரு யேசு கருணாநிதி
மதுரை உயர்மறைமாவட்டம்
இரக்கத்தின் தூதர்