தீபகத்திலிருந்து இறையாசீர்!

குழந்தைகள், இளைஞர்கள், பெற்றோர்கள் அனைவருக்கும் ஓர் அன்பான அழைப்பு.

அக்டோபர் மாதம் கத்தோலிக்கத் திருஅவையின் பாரம்பரியத்தில் செபமாலை அன்னையின் மாதமாக சிறப்பிக்கப்படுகிறது. இயேசுவின் அன்னை மரியாவை அன்புடன் நினைவுகூரவும், செபமாலையின் வழியாக கிறிஸ்துவின் வாழ்வின் மறையுண்மைகளைத் தியானிக்கவும் இந்த மாதம் நம்மை அழைக்கிறது.

செபமாலை என்பது வெறும் சொற்களைத் திரும்பத் திரும்பச் சொல்லும் செபம் அல்ல. அது அன்னை மரியாவின் கரத்தைப் பற்றிக்கொண்டு, இயேசுவின் பிறப்பு, பணி, பாடுகள், உயிர்ப்பு மற்றும் மகிமை ஆகிய மீட்பின் நிகழ்வுகளுக்குள் பயணம் செய்வதாகும். ஒவ்வொரு மறையுண்மையிலும் நாம் இயேசுவைச் சந்திக்கிறோம் அவருடைய அன்பைக் கற்றுக்கொள்கிறோம் நமது வாழ்வை அவருடைய வாழ்வோடு இணைத்துக்கொள்கிறோம்.

 

மரியா நம்மை இயேசுவிடம் அழைத்துச் செல்கிறார்

கானாவூர் திருமண விழாவில், “அவர் உங்களுக்குச் சொல்வதெல்லாம் செய்யுங்கள்” (யோவான் 2:5) என்று மரியா பணியாளர்களிடம் கூறினார். இதுவே இன்றும் அன்னை மரியா நமக்குத் தரும் செய்தியாகும். அவர் தம்மை மையப்படுத்துவதில்லை மாறாக, நம்மை இயேசுவிடம் அழைத்துச் செல்கிறார்.

"அருள் நிறைந்த மரியே வாழ்க" என்று நாம் செபிக்கும்போது, வானதூதர் கபிரியேல் கூறிய வாழ்த்தையும், எலிசபெத்து கூறிய ஆசிமொழியையும் நினைவுகூர்கிறோம் (லூக்கா 1:28, 42). எனவே, செபமாலை திருவிவிலியத்தில் வேரூன்றிய ஒரு செபமாகும். நற்செய்தியின் முக்கிய நிகழ்வுகளை நமது உள்ளத்தில் பதியவைக்கும் ஓர் எளிய தியானப் பள்ளியாகவும் அது விளங்குகிறது.

மரியா, இயேசுவைப் பற்றிய நிகழ்வுகளையெல்லாம் “தமது உள்ளத்தில் இருத்திச் சிந்தித்துக்கொண்டிருந்தார்" (லூக்கா 2:19). செபமாலை செபிக்கும்போது நாமும் மரியாவைப் போல இறைவார்த்தையை உள்ளத்தில் ஏற்று, சிந்தித்து, வாழக் கற்றுக்கொள்கிறோம்.

 

குடும்பத்தை ஒன்றிணைக்கும் செபம்

இன்றைய குடும்பங்கள் பல்வேறு சவால்களை எதிர்கொள்கின்றன. பெற்றோரின் வேலைப்பளு, குழந்தைகளின் படிப்புச் சுமை, இளைஞர்களின் குழப்பங்கள், கைப்பேசி மற்றும் சமூக ஊடகங்களின் ஆதிக்கம் ஆகியவை குடும்ப உறுப்பினர்கள் ஒரே வீட்டுக்குள் இருந்தாலும் தனித்தனி உலகங்களில் வாழச் செய்கின்றன.

இந்தச் சூழலில் குடும்பச் செபமாலை அனைவரையும் மீண்டும் ஒன்றாக அமரச் செய்கிறது. ஒருவரை ஒருவர் பார்க்கவும், கேட்கவும், அன்போடு செபிக்கவும் வாய்ப்பளிக்கிறது. குடும்பத்தில் அமைதி, மன்னிப்பு, ஒற்றுமை மற்றும் நம்பிக்கையை வளர்க்கிறது. குடும்பச் செபம் எல்லாப் பிரச்சினைகளையும் உடனடியாக நீக்கிவிடாது. ஆனால் அவற்றை இறைநம்பிக்கையோடு எதிர்கொள்ளும் வலிமையைத் தருகிறது.

எனவே, அக்டோபர் மாதத்தில் ஒவ்வொரு குடும்பமும் நாள்தோறும் ஒரு குறிப்பிட்ட நேரத்தைச் செபமாலைக்காக ஒதுக்குவோம். முடியுமானால் முழுச் செபமாலையையும் செபிப்போம். நேரம் குறைவாக இருந்தால், குறைந்தபட்சம் ஒரு பத்து பத்து மணியையாவது குடும்பமாகச் செபிப்போம். குடும்பத்தின் ஒவ்வோர் உறுப்பினரும் மாறிமாறி ஒரு மறையுண்மையை வழிநடத்தலாம்.

 

குழந்தைகளுக்கு ஓர் அழைப்பு

அன்பான குழந்தைகளே, செபமாலை உங்கள் கைகளில் இருக்கும் ஒரு சிறிய விண்ணக மாலை. அதன் ஒவ்வொரு மணியிலும் இயேசுவுக்கும் அன்னை மரியாவுக்கும் நீங்கள் ஒரு மலரை அர்ப்பணிப்பதாக நினைத்துக்கொள்ளுங்கள்.

உங்கள் பெற்றோர், ஆசிரியர்கள், நண்பர்கள், நோயுற்றவர்கள் மற்றும் ஏழைக் குழந்தைகளுக்காகச் செபியுங்கள். செபமாலை சொல்லும்போது அவசரப்படாமல், இயேசுவின் வாழ்க்கையில் நடைபெற்ற நிகழ்வுகளை மனக்கண்ணால் காண முயலுங்கள். தினமும் ஒரு பத்து மணியைச் செபிப்பது உங்கள் வாழ்வில் நல்ல பழக்கத்தையும், உள்ளத்தில் அமைதியையும் வளர்க்கும்.

 

இளைஞர்களுக்கு ஓர் அழைப்பு

அன்பான இளைஞர்களே, உங்கள் வாழ்க்கை பல கனவுகள், முடிவுகள், உறவுகள் மற்றும் சவால்கள் நிறைந்தது. உங்கள் அழைப்பையும் எதிர்காலத்தையும் சரியாகத் தேர்ந்தெடுக்க இறைவனின் வழிகாட்டுதல் அவசியம்.

செபமாலை உங்கள் மனதை அமைதிப்படுத்தி, உங்கள் வாழ்க்கையை இயேசுவின் பார்வையில் காண உதவும். உங்கள் ங்கள் படிப்பு, வேலை, நட்பு, திருமண அழைப்பு அல்லது இறையழைத்தல் ஆகிய அனைத்தையும் அன்னை மரியாவின் வழியாக இயேசுவிடம் ஒப்படையுங்கள். தினமும் கைப்பேசிக்காகச் செலவிடும் நேரத்தில் சில நிமிடங்களையாவது செபமாலைக்காக வழங்குங்கள். பயணத்தின்போது, காத்திருக்கும் நேரத்தில் அல்லது இரவு உறங்குவதற்குமுன் ஒரு பத்து மணியைச் செபியுங்கள்.

செபமாலையை ஒரு பழைய பக்திமுயற்சியாக எண்ணாதீர்கள். அது சிதறிய மனத்தை ஒருமுகப்படுத்தும் செபம் சோதனைகளில் உறுதியாக நிற்க உதவும் ஆன்மிக வலிமை சரியான முடிவுகளை எடுக்க வழிகாட்டும் அமைதியின் பாதை.

 

பெற்றோர்களுக்கு ஓர் அழைப்பு

அன்பான பெற்றோர்களே, குழந்தைகளுக்கு நீங்கள் வழங்கும் செல்வங்களிலேயே மிகப் பெரியது இறைநம்பிக்கையாகும். செபமாலை செபிக்கும்படி குழந்தைகளிடம் கூறுவது மட்டும் போதாது, அவர்களோடு அமர்ந்து செபிப்பதே சிறந்த சாட்சியாகும்.

வீட்டிலுள்ள அன்னை மரியாவின் திருவுருவத்திற்குமுன் ஒரு விளக்கை ஏற்றி, குடும்பத்தினரை அன்போடு ஒன்றுசேர்த்து, சிறிது நேரம் செபியுங்கள். குழந்தைகளை வற்புறுத்தாமல், செபத்தின் பொருளை எளிமையாக விளக்குங்கள். குடும்பத்தின் தேவைகள், இறந்தவர்கள், நோயுற்றவர்கள், ஏழைகள், தனிமையில் இருப்பவர்கள் மற்றும் உலக அமைதிக்காகச் செபிக்க அவர்களைப் பழக்குங்கள்.

பெற்றோரின் முழந்தாள் செபம் குழந்தைகளின் எதிர்காலத்தை ஆசீர்வதிக்கிறது. குடும்பம் சேர்ந்து செபிக்கும் காட்சி, குழந்தைகளின் மனதில் வாழ்நாள் முழுவதும் அழியாத நம்பிக்கையின் நினைவாக நிலைத்திருக்கும்.

 

பங்குகள் மேற்கொள்ளக்கூடிய முயற்சிகள்

அக்டோபர் மாதத்தில் நமது பங்குகள் செபமாலை பக்தியைப் புதுப்பிக்க சில எளிய முயற்சிகளை மேற்கொள்ளலாம்:

• தினமும் திருப்பலிக்கு முன்போ பின்போ சமூகமாகச் செபமாலை செபித்தல்.
• குடும்பங்கள் மாறிமாறி செபமாலையை வழிநடத்துதல்.
• அன்னை மரியாவின் திருவுருவத்தை வீடுகளுக்கு எடுத்துச் சென்று குடும்பச் செபம் நடத்துதல்.
• குழந்தைகள் மற்றும் இளைஞர்களுக்கான செபமாலைப் போட்டிகள், விவிலிய வினாடி வினா மற்றும் படைப்பாற்றல் நிகழ்வுகளை நடத்துதல்.
• நோயுற்றோர், முதியோர் மற்றும் தனிமையில் வாழ்பவர்களின் வீடுகளுக்குச் சென்று அவர்களோடு செபித்தல்.
• உலக அமைதி, குடும்ப ஒற்றுமை, இளைஞர்களின் நல்வாழ்வு மற்றும் திருஅவையின் தேவைகளுக்காகச் சிறப்பு செபமாலை நடத்துதல்.
• செபத்தோடு இணைந்து ஏழை அல்லது தேவையில் இருக்கும் ஒரு குடும்பத்திற்கு உதவுதல்.

 

செபமாலையோடு வாழ்வையும் இணைப்போம்

அன்னை மரியாவை மதிப்பது அவருடைய திருவுருவத்திற்கு மலர் அணிவிப்பதோடு முடிவதில்லை. அவரைப்போல இறைவார்த்தையைக் கேட்பதும், இறைத்திட்டத்திற்கு "ஆம்" என்று கூறுவதும், துன்பப்படுவோருக்கு உதவுவதும், இயேசுவை நமது வாழ்வில் பிறருக்குக் கொடுப்பதுமே உண்மையான மரியன்னை பக்தியாகும்.

செபமாலை செபித்த பிறகு குடும்பத்தில் கோபமும் பகையும் தொடரக் கூடாது. செபித்த கரங்கள் உதவி செய்ய முன்வர வேண்டும். அன்னை மரியாவை வாழ்த்தும் உதடுகள் பிறரை இகழக் கூடாது. இயேசுவின் மறையுண்மைகளைத் தியானிக்கும் இதயம் ஏழைகள், நோயுற்றவர்கள் மற்றும் துன்பப்படுவோரின் குரலைக் கேட்க வேண்டும்.

இந்த அக்டோபர் மாதத்தில் நாம் ஒரு சிறிய உறுதி எடுப்போம்: தினமும் செபமாலை செபிப்போம் குடும்பமாக ஒன்றிணைவோம் இறைவார்த்தையைத் தியானிப்போம் அன்பின் செயல்களைச் செய்வோம்.

அன்னை மரியாவின் கரத்தைப் பற்றிக்கொண்டு இயேசுவை நோக்கி நடப்போம். நமது குழந்தைகள் நம்பிக்கையில் வளரவும், இளைஞர்கள் தூய்மையுடனும் தெளிவுடனும் வாழவும், பெற்றோர்கள் அன்பிலும் பொறுமையிலும் நிலைத்திருக்கவும், குடும்பங்கள் ஒற்றுமையின் இல்லங்களாக மாறவும் செபிப்போம்.

செபமாலை அன்னையே, எங்களுக்காக வேண்டிக்கொள்ளும்!

எங்கள் குடும்பங்களை உமது அன்புப் பாதுகாப்பில் காத்தருளும்!

எங்களை எப்போதும் உமது திருமகன் இயேசுவிடம் அழைத்துச் செல்லும்!

ஆமென்.

முனைவர் அருட்பணி. ஜேசுதாஸ் ச.ச 

இயக்குநர், தீபகம்